इम्तियाज जलील यांच्या प्रचार रॅलीवर हल्ला

 

एमआयएमचे नेते आणि माजी खासदार इम्तियाज जलील यांची सोमवारी बायजीपुरा भागात प्रचार रॅली आयोजित करण्यात आली होती. प्रचारादरम्यान सुरुवातीला काही नाराज कार्यकर्त्यांकडून रॅलीला काळे झेंडे दाखवून निषेध करण्यात आला. त्यानंतर हा विरोध अधिक उग्र स्वरूपात बदलला. प्रचार रॅलीदरम्यान इम्तियाज जलील यांच्या कारवर हल्ला करण्याचा प्रयत्न झाल्याची गंभीर घटना घडली.

इम्तियाज जलील यांच्या प्रचार रॅलीवर हल्ला 

छत्रपती संभाजीनगर महापालिका निवडणुकीचा प्रचार आता अंतिम टप्प्यात पोहोचला असून, मराठवाड्याची राजधानी असलेल्या या शहराकडे संपूर्ण राज्याचे लक्ष लागले आहे. या निवडणुकीत सत्तेसाठी सर्व प्रमुख पक्षांनी पूर्ण ताकद पणाला लावली असून, प्रचाराच्या रणधुमाळीत राजकीय वातावरण अधिकच तापले आहे. शिवसेनेचे दोन गट, भाजप, एमआयएम तसेच काँग्रेस-राष्ट्रवादी काँग्रेस या सर्वच पक्षांनी आपली ताकद आजमावण्यास सुरुवात केली आहे.

निष्ठावंत कार्यकर्त्यांमध्ये नाराजी

या निवडणुकीत एमआयएमने मोठा निर्णय घेत विद्यमान २२ नगरसेवकांची उमेदवारी कापून नव्या चेहऱ्यांना संधी दिली आहे. या निर्णयामुळे पक्षातील काही जुन्या आणि निष्ठावंत कार्यकर्त्यांमध्ये नाराजी पसरली होती. या असंतोषाचे पडसाद आता प्रत्यक्ष रस्त्यावर उमटू लागल्याचे चित्र समोर आले आहे. विशेषतः बायजीपुरा परिसरात झालेल्या घटनेमुळे शहरातील राजकीय वातावरण अधिकच तणावपूर्ण झाले आहे.

एमआयएमचे नेते आणि माजी खासदार इम्तियाज जलील यांची सोमवारी बायजीपुरा भागात प्रचार रॅली आयोजित करण्यात आली होती. प्रचारादरम्यान सुरुवातीला काही नाराज कार्यकर्त्यांकडून रॅलीला काळे झेंडे दाखवून निषेध करण्यात आला. त्यानंतर हा विरोध अधिक उग्र स्वरूपात बदलला. प्रचार रॅलीदरम्यान इम्तियाज जलील यांच्या कारवर हल्ला करण्याचा प्रयत्न झाल्याची गंभीर घटना घडली.

जलील यांना बाहेर काढून मारहाण 

प्रत्यक्षदर्शींनी दिलेल्या माहितीनुसार, ज्या वाहनावर हल्ला करण्याचा प्रयत्न झाला, त्या वाहनाच्या पुढील सीटवर इम्तियाज जलील बसले होते. काही संतप्त कार्यकर्त्यांनी धावत्या गाडीच्या मागे धाव घेत जलील यांना बाहेर काढून मारहाण करण्याचा प्रयत्न केल्याचे सांगण्यात येत आहे. या संपूर्ण घटनेचे व्हिडिओ सध्या सोशल मीडियावर मोठ्या प्रमाणात व्हायरल झाले असून, त्यामुळे राजकीय वर्तुळात एकच खळबळ उडाली आहे.

घटनेची गंभीरता लक्षात घेत पोलिसांनी तत्काळ हस्तक्षेप करत सौम्य लाठीचार्ज केला आणि परिस्थिती नियंत्रणात आणली. पोलिसांच्या तत्परतेमुळे मोठा अनर्थ टळला असला, तरी या गोंधळात इम्तियाज जलील यांचा एक कार्यकर्ता जखमी झाल्याची माहिती एमआयएमच्या कार्यकर्त्यांनी दिली आहे. जखमी कार्यकर्त्याला तातडीने उपचारासाठी रुग्णालयात दाखल करण्यात आले.

 एमआयएमकडून गंभीर आरोप 

या घटनेनंतर एमआयएमकडून गंभीर आरोप करण्यात आले आहेत. इम्तियाज जलील यांच्या रॅलीवर झालेला हा हल्ला काँग्रेसच्या एका उमेदवाराच्या समर्थकांकडून करण्यात आल्याचा आरोप एमआयएमच्या नेत्यांनी केला आहे. मात्र, काँग्रेसकडून या आरोपांवर अद्याप अधिकृत प्रतिक्रिया देण्यात आलेली नाही. या प्रकरणाचा पुढील तपास बायजीपुरा भागातील जिंसी पोलीस ठाण्याच्या हद्दीत सुरू असून, पोलिसांकडून सीसीटीव्ही फुटेज आणि व्हायरल व्हिडिओंच्या आधारे तपास केला जात आहे.

दरम्यान, संभाजीनगर महापालिका निवडणुकीनंतर केवळ एमआयएममध्येच नव्हे, तर भाजप आणि शिवसेनेतही नाराजीचे सूर उमटले होते. उमेदवारी नाकारण्यात आल्याने अनेक नाराज कार्यकर्त्यांनी थेट नेत्यांच्या घरासमोर आंदोलन केले होते. काही ठिकाणी नेत्यांच्या गाड्या अडवण्याचे प्रकारही घडले होते. त्यामुळे निवडणुकीच्या पार्श्वभूमीवर शहरातील राजकीय वातावरण आधीपासूनच अस्थिर होते.

 कार्यकर्त्यांमधील असंतोष रस्त्यावर

राजकीय विश्लेषकांच्या मते, या निवडणुकीत अनेक ठिकाणी निष्ठावंत आणि तळागाळातील कार्यकर्त्यांना डावलून उमेदवारी देण्यात आल्याचा आरोप होत आहे. यामुळे कार्यकर्त्यांमधील असंतोष रस्त्यावर येत असून, त्याचे रूपांतर हिंसक घटनांमध्ये होण्याची शक्यता वाढली आहे. छत्रपती संभाजीनगरसह राज्यातील ज्या-ज्या महानगरपालिकांच्या निवडणुका सुरू आहेत, तेथेही अशीच परिस्थिती दिसून येत आहे.

 प्रशासनासमोर मोठे आव्हान

या पार्श्वभूमीवर, प्रमुख पक्ष आणि नेत्यांनी निवडणुका ‘हायजॅक’ केल्या आहेत का, असा प्रश्न आता उपस्थित केला जात आहे. प्रचाराच्या शेवटच्या टप्प्यात अशा घटनांमुळे कायदा आणि सुव्यवस्थेचा प्रश्न निर्माण होऊ नये, यासाठी पोलिस प्रशासनाने अधिक सतर्क राहण्याची गरज असल्याचे मत व्यक्त केले जात आहे.

महापालिका निवडणूक शांततेत पार पडावी, तसेच कोणत्याही प्रकारच्या हिंसाचाराला आळा बसावा, यासाठी सर्व राजकीय पक्षांनी संयम बाळगावा, असे आवाहन प्रशासनाकडून करण्यात येत आहे. आगामी काही दिवसांत प्रचार आणखी तीव्र होणार असल्याने, अशा घटनांची पुनरावृत्ती टाळणे हे प्रशासनासमोर मोठे आव्हान ठरणार आहे.